نقط على الحروف

نقط على الحروف

قبل اسبوع من النهاردة كانت بداية جولة الاعادة فى انتخابات الرئاسة المصرية الى جذبت انتباه مش بس المصريين لكن تقريبا كل الدول العربية و جزء كبير من دول العالم

كل واحد كان رايح الانتخابات دى و مقرر هايعمل ايه .... فى ناس أيدت محمد مرسى و ناس أيدت احمد شفيق و ناس قررت انها تقاطع او تبطل صوتها

و بدأت جولة الاعادة بعد فترة عصيبة و عصبية اتعمل فيها حرب اعلامية شرسة من الطرفين و للاسف تم استعمال اقذر الوسائل الى ممكن تستخدم فى معركة انتخابية من شحن طائفى لاتهامات بالتخوين و بيع البلد و اهدار دم الشهداء و حق المصابين و حصل الى حصل و ظهرت النتيجة بعد خمس ايام الناس كانت قربت تولع فى بعضها خلالهم و كل طرف بيدعى انها بتتطبخ للطرف التانى

المهم اخيرا اعلنت لجنة الانتخابات الرئاسية فوز السيد محمد مرسى برئاسة الجمهورية

قبل اى حاجة دى نتيجة الصناديق و باحترمها و اقبلها برغم عدم قبولى لفكر و منهج و مرجعية السيد الرئيس لكن احتراما و تقديرا للناس الى ايدته و ده حقهم علىَ

المهم هنا ان الموقف الى اخدته قوى و افراد محسوبين على تيار مخالف تماما للتيار الاسلامى و الى على رأسه جماعة الاخوان المسلمين الى منها سيادة الرئيس هو الى دعم و وصل سيادته لكرسى الرئاسة و ده الموقف الى عايز احط النقط على الحروف بالنسبة له

-        تأييد اى شخص او تيار مخالف تماما لمنهج و قناعة الشخص الى بأيده هى عملية انتحار فكرى و ربما سياسى و ماينفعش اقول انى بأيد فلان بس مش بأيد افكاره او منهجه... لان ده إما غباء او نصب سياسى لان المفروض ان التأييد فى عملية انتخابية سياسية تكون مبنية على الافكار و المناهج مش على الاشخاص و انا هنا باتكلم على من يدعى انه يمارس نشاط سياسى او مثقف سياسى مش مواطن عادى بينتخب الى بيحبه و يرتاح له

-        فكرة التأييد المبنية على الاصطفاف لمقاومة اتجاه معين بيهدد الثورة فكرة قديمة و مستهلكة و بتنسف العمل الثورى من اساسه الى المفروض انه حصل لتحرير العقول و الافكار فى مختلف الاتجاهات و الفيصل هو الاحتكام لعملية انتخابية نزيهة تفرز الاتجاه صاحب الاغلبية مع فرض ان مافيش اى اعمال ترهيب او حشد على اساس طائفى

-        استخدام مصطلح الثورة المضادة كفزاعة اخوف الناس بيها علشان ينتخبوا شخص ما و إلا هايحصل فيهم كذا و كذا دى هى بعينها الثورة المضادة لثورة قامت تنادى بالحرية و كسر حاجز الخوف و ان كل واحد لازم يحارب علشان يدافع عن حقه و لو كان الشباب الى نزل الشارع يوم 25 يناير خاف او عمل حساب للقمع ماكانوش نزلوا  

-        النتيجة الى وصلنا ليها ان مرشح جماعة الاخوان المسلمين ( اللى هى الجماعة الام و المنبع الفكرى لكل الجماعات الدينية المتشددة و اللى وصلت لغاية استعمال كل اشكال العنف المسلح لفرض وجودها و فكرها ) اصبح رئيس الجمهورية و رئيس السلطة التنفيذية و اللى كمان بيطالبوا انه يكون له كامل الصلاحيات على السلطة التشريعية و القضائية يعنى زى ما كان حسنى مبارك تماما بس على اسوأ لانه بمرجعية دينية لا تقبل النقاش و الاختلاف معها

-        اكرر ان ده حصل بمساعدة كتير من القوى المحسوبة على تيارات مناقضة تماما لتيار و فكر و منهج جماعة الاخوان المسلمين و ده الى هايفضل وصمة عار فى تاريخهم لما يتمكن الاخوان المسلمين من الحكم و يسيطروا بفكرهم و منهجبتهم على كل حاجة فى البلد و ده مش هايمحيه حتى ان لو قدموا ارواحهم ذبيحة للغفران لان ساعتها هايكون التغيير اصعب و اقسى و تمنه دم كتير من الناس هايروح فى سكة التغيير و هم هايكونوا اول ناس مسئولين عن كده

-        محاولة بعض منهم دلوقت انه يظهر بمظهر المعارض الشرس لو حصل و ان جماعة الاخوان هددوا الحقوق و الحريات العامة محاولة غبية لغسل ايديهم من دم الابرياء الى هايتعرضوا للتنكيل لانهم مهما عارضوا و كتبوا و اتكلموا مش هايغيروا الحقيقة التاريخية انهم الى وصلوهم و ساعدوهم على كده

-        مافيش حد يقول ان الاختيار بين مرشح النظام القديم و مرشح الاخوان هو السبب و هو الى دفعنى للاختيار ده ... لا يا سيدى لان ده معناه خوفك و رعبك من نظام بتقول انك ثرت عليه و كسرت حاجز الخوف من ناحيته. و معناه ان طاقتك الثورية خلاص خلصت و كان لازم انك تنسحب من سكوت بدل ما تورط نفسك و تورط بلد فى اختيار مش احسن من الاختيار الاول ان ماكانش اسوأ

-        الحل يا سادة كان فى انكوا ترفضوا الخيارين و تعلنوا انكم لسه ماضعفتوش و لا السياسة زغللت عنيكوا و ماعدتوش شايفين و تقفوا فى كل مكان تعلنوا ان الثورة لسه مستمرة و الكلام ده كان هيكون لأى حد فيهم موقفكم ساعتها يا سادة كان هايكون اشرف و انبل و افضل من انكم تنقلبوا على المرشح الى أيدتوه

-        كونك تتصور ان ممكن مع ضغطك على جماعة الاخوان المسلمين انهم يتصرفوا عكس مبادئهم او ادبياتهم الى ليهم عشرات السنين بيتشربوها و يشربوها للاجيال الى بعدهم تبقى مغفل و جاهل و لا تقرأ التاريخ و ان قرأته فلا أنت فهمته و لا اتعلمت منه حاجة لانهم ممكن يسايروك انت و غيرك ( و دى حاجة مش جديدة عليهم ) لغاية ما يتحكموا فى مفاصل البلد كلها و دا ممكن بعد سنين او عقود و ساعتها انت هاتكون اول واحد يدفع تمن وصولهم للحكم و بعديك الناس الغلابة الى كانت ماشية وراك و مصدقاك

-        لو برضه مصمم ان الجماعة اكيد هاتغير سلوكها و تضم علي باقى القوى الثورية خاصة بعد ماحسوا انهم من غيرها كانوا هايخسروا كل حاجة و ان تأييد الناس للقوى الثورية كان اكبر من تأييدها للاخوان اسمحلى اقولك ان انا ممكن اوافقك فى ده بس بشرط ان جماعة الاخوان المسلمين تنسى تاريخها و كل الى اتعلموه على أيد مرشديها و علمائها و منظريها من اول حسن البنا لغاية النهاردة و يراجعوا كل ده و يعدلوه و لو انى شايف ان قيام الساعة ممكن يحصل قبل ما يعملوا الكلام ده

اخيرا يا ريت كل واحد يسجل اسماء الافراد و القوى دى علشان حساب الزمن مايضعش لان الخطأ وارد و الاعتذار يمكن قبوله ... إلا ... فى حالة تهديد مصير الشعوب

الحساب لازم يتحسب و كل الى اخطأوا فى حق الشعب مش هايقبل منهم اعتراف بالخطأ او أعتذار

انا عن نفسى مسجلهم كلهم ويحز فى نفسى ان منهم ناس كنت باحترمها و أقدرها و بأعتبرهم منارة خلاص لمصر لكن هم الى عملوا فى نفسهم كده