سيناريوهات ما بعد جولة الاعادة ( تحديث )

طبعا واضح بعد حكم المحكمة الدستورية امبارح ان السيناريو الاول مالوش مكان دلوقت و يفضل معانا الاتنين التانيين و ان كانت فرص السيناريوهين بقت متساوية برغم ان كل الشواهد بتقول ان سيناريو شفيق رئيس هو الاقرب و الارجح لخلفية مبنية على ان القوى المساندة لنظام الدولة القديم هاتعمل المستحيل علشان تنجح شفيق 
المهم دلوقت او الى يهمنى شخصيا هو موقف الثورة و القوى الثورية الى واضح جدا مع احترامى ان جماعة الاخوان مصرة انها تستغلها كوسيلة حشد انتخابى و فى حالة سقوط مرشحها هاتستغلها كقوة ضغط فى الشارع بحجة ان الانتخابات كانت نزورة و هاتحاول توصل بيها لاى مكاسب سياسية
القوى الثورية دى مش بس الليبراليين و العلمانيين و اليساريين لكن من ضمنها اسلاميين متحررين من الطاعة العمياء لقيادة بتستغلها و دول الى كانوا بيأيدو دكتور ابو الفتوح 
القوى دى لو فعلا لسه عندها امل تكمل الى بدأته يوم 25 يناير 2011 لازم تفصل نفسها تماما عن الصراع السياسى الى بكل الاحوال مش هايكون لمصلحتها. القوى دى لازم تحتفظ بالهدف و النقاء الثورى الى اجتمعت عليه و هو حب مصر و حب كل الناس لدرجة ان فى ناس ماتت علشان تجيبلهم الحرية و العدالة و حق المواطنة 
السنة و النصف الى فاتت اثبتت لينا كلنا ان الاهداف الاصيلة الى كانت وقود محرك الثورة اتركنت على جنب و حلت مكانها اهداف تانية حسب كل فصيل سياسى و انهم كلهم بدون استثناء كانو بيتاجروا اعلاميا بدم الناس الى ماتت 
الخيارات دلوقت بقت واضحة اكتر و ده الوقت الى الثورة فعلا تقدر تثبت لنفسها و و لغيرها انها كانت ثورة شعبية مش هوجة شباب فاض بيه الكيل 


مافيش غير اختيارين يا اما مع او ضد الثورة....؟؟؟؟


مع الثورة يبقى ارجع اقف ضد كل الى بيحاولوا يخنقوها و يتوهوها فى سراديب قانونية دستورية و لعبة انتخابات انت اول واحد عارف كويس ان مهما كان الى هايفوز مش هايكون فى صفك و مايهموش مطالبك الى كانت السبب انك عملت ثورة
اعلن دلوقت حالا انك ضد كل الى بيحصل ده و ان السكة دى مش سكتك و ان ثورتك لسه مستمرة لغاية ما توصل لاهدافها الحقيقية 
و لو انت ضد يبقى مش فارقة تختار مين لان الاتنين هايكونوا حاجة واحدة 
الاتنين هايكونوا واجهة لدولة استبدادية على رأسها عسكر لا انت و لا البلد تهمهم فى حاجة المهم بس انهم يفضلوا ماسكينها و مسيطرين عليها علشان مصالحهم هم والى معاهم 
خلاص مافيش فاضل غير يومين فكر و خد قرارك 


انا خدت قرارى من زمان انا مكمل مع الثورة